AI SECURITY · CHECK POINT RESEARCH

2026 оны 10 дугаар сарын 23 | Эх сурвалж: Check Point Research

Хиймэл оюун ухаанд суурилсан туслах хэрэгслүүд нь байгууллагуудын өдөр тутмын үйл ажиллагаа, тэр дундаа программ хангамж хөгжүүлэлтийн салшгүй хэсэг болжээ. Гэвч эдгээр технологийн хэрэглээ өргөжихийн хэрээр кибер халдагчдын сонирхлыг татах мэдээллийн төрөл ч өөрчлөгдөж эхэлжээ.

Check Point Research (CPR)-ийн судлаачид Aokigahara нэртэй, хэрэглэгчийн мэдээлэл хулгайлах зориулалттай хортой программ буюу infostealer-ийг шинжилж, ChatGPT, Claude, Cursor, GitHub Copilot зэрэг AI хэрэгслийн нэвтрэлтийн мэдээлэл, идэвхтэй session болон тохиргооны файлуудыг цуглуулах боломжтой болохыг тогтоосон байна.

Ялангуяа байгууллагын эх код, cloud дэд бүтэц, хөгжүүлэлтийн системтэй ажилладаг мэргэжилтнүүдийн хувьд AI хэрэгслийн нэвтрэх мэдээлэл алдагдах нь нэг хэрэглэгчийн бүртгэлээс давсан эрсдэл үүсгэх аюултай юм.

Aokigahara гэж юу вэ?

Aokigahara нь халдварласан төхөөрөмжөөс хэрэглэгчийн нэвтрэх мэдээлэл болон бусад эмзэг мэдээллийг цуглуулж, халдагчийн удирддаг серверт дамжуулах зориулалттай хортой программ юм.

Уламжлалт infostealer программуудын нэгэн адил интернэт хөтчид хадгалсан нууц үг, cookie, криптовалютын хэтэвч, цахим шуудангийн программ, password manager, VPN зэрэг үйлчилгээний мэдээллийг онилдог.

Харин Aokigahara-ийн онцлог нь AI application болон программ хөгжүүлэлтийн орчныг тусгайлан онилсон өгөгдөл цуглуулах модультайд оршиж байна.

Судалгаагаар дараах AI хэрэгслүүдтэй холбоотой файлуудыг хайж, цуглуулах боломжтойг тогтоожээ.

Эдгээр хэрэгслийн зарим нь хэрэглэгчийн нэвтрэлтийг баталгаажуулах token, session-ийн мэдээлэл болон тохиргооны файлуудыг төхөөрөмж дээр хадгалдаг. Тухайн мэдээлэлд хүчинтэй нэвтрэх эрх агуулагдаж байвал халдагч нууц үгийг нь мэдэхгүй байсан ч хэрэглэгчийн бүртгэлд нэвтрэх боломж үүсэж болзошгүй.

Хортой программ мэдээллийг хэрхэн хулгайлдаг вэ?

Aokigahara нь халдварласан төхөөрөмж дээр ажиллаж эхэлмэгц төрөл бүрийн мэдээллийг тусгай модулиудаар цуглуулдаг.

Судлаачдын онцолсноор Aokigahara нь AI session-ийн мэдээллийг бусад өгөгдлөөс тусад нь ангилан хадгалдаг. Энэ нь AI үйлчилгээнд нэвтрэх мэдээллийг санамсаргүй цуглуулж байгаа бус, зориуд онилсон болохыг харуулах нэг чухал баримт юм.

Яагаад AI хэрэгслүүд халдагчдын бай болж байна вэ?

Өмнө нь мэдээлэл хулгайлах хортой программуудын гол бай нь хөтчийн нууц үг, банкны мэдээлэл, криптовалютын хэтэвч зэрэг байв. Харин AI технологи байгууллагын үйл ажиллагаанд гүнзгий нэвтрэхийн хэрээр хэрэглэгчдийн AI бүртгэлд хадгалагдаж буй мэдээлэл үнэ цэнтэй болж байна.

Өнөөдөр программ хөгжүүлэгчид AI туслахуудад эх кодоо тайлбарлуулах, алдаа засуулах, хөгжүүлэлтийн баримт бичиг боловсруулах зэрэг даалгавар өгдөг. Байгууллагын бусад ажилтнууд гэрээ, тайлан, дотоод баримт бичиг болон бизнесийн мэдээлэл боловсруулахад эдгээр хэрэгслийг ашиглаж байна.

Хэрэв халдагч хүчинтэй session token эсвэл нэвтрэх мэдээлэл олж авбал тухайн үйлчилгээнд хадгалагдаж, бүртгэлээр дамжуулан үзэх боломжтой дараах мэдээлэл эрсдэлд орж болзошгүй.

• Хэрэглэгчийн AI туслахтай хийсэн хувийн болон ажлын харилцан ярианы түүх
• AI үйлчилгээнд оруулсан программын эх код, хөгжүүлэлтийн мэдээлэл
• Байгууллагын нууц баримт бичиг, бизнесийн эмзэг мэдээлэл
• Төлбөртэй AI үйлчилгээний зөвшөөрөлгүй хэрэглээ

Мөн хулгайлагдсан нэвтрэх эрхийг бусдад худалдах, мэдээллийг ашиглан мөнгө нэхэх зэрэг эрсдэл үүсэх боломжтой.

AI хэрэгслийн бүртгэлээс цааш: Git, SSH болон cloud орчин ч эрсдэлд оржээ

Aokigahara-ийн шинжилгээнээс гарсан өөр нэг чухал дүгнэлт нь хортой программ зөвхөн AI хэрэгслийн нэвтрэх мэдээллээр хязгаарлагдахгүй байгаа явдал юм.

Тус программ нь хөгжүүлэгчдийн ашигладаг систем, үйлчилгээний нэвтрэх мэдээллийг давхар цуглуулах чадвартай. Үүнд Git credential, SSH private key агуулж болзошгүй файлууд, мөн AWS, Microsoft Azure, Google Cloud орчны нэвтрэх мэдээлэл болон тохиргооны файлууд багтжээ.

Энэ нь байгууллагын хувьд илүү өргөн хүрээний эрсдэл үүсгэж байна.

Жишээлбэл, программ хөгжүүлэгчийн компьютер халдварласан тохиолдолд зөвхөн ChatGPT эсвэл Cursor-ийн нэвтрэх мэдээлэл төдийгүй программын эх код хадгалдаг repository болон cloud дэд бүтцэд нэвтрэхэд ашигладаг мэдээлэл алдагдаж болзошгүй.

Гэхдээ Check Point Research-ийн судалгаагаар AI болон хөгжүүлэлтийн мэдээлэл цуглуулах модулиуд тусдаа ажилладаг. Иймээс халдагчид эдгээр мэдээллийг зориуд нэгтгэн, дараалсан халдлага хийхээр төлөвлөсөн гэж шууд дүгнэх үндэслэл одоогоор байхгүй.

Харин нэг төхөөрөмж дээр AI хэрэгсэл, хөгжүүлэлтийн орчин, cloud үйлчилгээний нэвтрэх мэдээлэл зэрэг хадгалагдаж байвал тухайн төхөөрөмж халдварлах үед олон системийн аюулгүй байдал зэрэг эрсдэлд орох боломжтойг судалгаа сануулж байна.

Байгууллагууд ямар арга хэмжээ авах шаардлагатай вэ?

Судлаачдын үзэж байгаагаар байгууллагууд AI хэрэгслийн аюулгүй байдлыг зөвхөн хэрэглэгч ямар мэдээлэл оруулж байгаагаар хязгаарлан авч үзэх нь хангалтгүй болжээ.

AI үйлчилгээнд нэвтрэх эрх, authentication token, session-ийн мэдээлэл болон тэдгээрийг хадгалдаг төхөөрөмжийн хамгаалалтыг цогцоор нь авч үзэх шаардлагатай.

Үүний тулд байгууллагууд дараах чиглэлд анхаарахыг Check Point Research зөвлөсөн байна.

AI нэвтрэх эрх кибер халдлагын шинэ бай болж байна

Aokigahara-ийн илрүүлэлт нь хиймэл оюун ухааны хэрэглээ нэмэгдэхийн хэрээр кибер аюулгүй байдлын хамгаалах шаардлагатай хүрээ хэрхэн тэлж байгааг харууллаа.

Байгууллагууд AI хэрэгсэлд ямар мэдээлэл оруулж болох, тэдгээрийг хэрхэн аюулгүй ашиглах тухай бодлого хэрэгжүүлэхэд анхаардаг. Гэвч AI үйлчилгээнд нэвтрэх эрхийг хамгаалах асуудал үүнтэй адил чухал болж байна.

Учир нь AI туслахууд программын эх код, байгууллагын баримт бичиг, дотоод системтэй улам нягт уялдаж байгаа тул тэдгээрийн нэвтрэх мэдээлэл алдагдах нь бусад системийн аюулгүй байдалд ч нөлөөлөх эрсдэлтэй.

Check Point Research-ийн судалгааны гол дүгнэлт нь AI хэрэгслийн authentication token болон session-ийн мэдээллийг browser-ийн нэвтрэх эрх, cloud credential, хөгжүүлэгчдийн SSH key зэрэгтэй адил хамгаалах шаардлагатай болсон явдал юм.

Ийнхүү AI технологи ажлын байрны өдөр тутмын хэрэглээнд нэвтрэхийн хэрээр түүнийг ашиглахад шаардагдах нэвтрэх эрх, session болон хөгжүүлэлтийн орчны мэдээлэл кибер халдагчдын хувьд шинэ бай болж байна.

Мэдээллийн аюулгүй байдлын шийдлийг нэвтрүүлэгч Вертексмон компани.